Зөфәр Хәйретдинов: Чын автор җыры белән тамак туйдыра
«Җыр – товар ул. Ул товар кебек үк кулланылырга, җырланырга, акча китерергә тиеш», - диде композитор.
Россия авторлар җәмгыятенең (РАО) Татарстандагы бүлекчәсе җитәкчесе, Татарстанның халык артисты, композитор Зөфәр Хәйретдинов җыры белән тамак туйдыра торган авторларны «чын автор» дип атады.
«Кайбер авторлар: «Минем җырны җырласыннар, миңа бернәрсә дә кирәк түгел», – ди. Алар бер җыр яза да, «минем җырны җырлыйлар» дип, сөенеп йөри. Аларга аның акчасы кирәкми. Ул чын автор түгел. Чын автор ул – җыры белән тамак туйдыра торган автор. Аның хезмәте шул», - диде ул «Татар-информ» хәбәрчесенә биргән әңгәмәсендә.
Аның фикеренчә, җыр ул – авторның хезмәте. «Ул ничек тели, шулай җыр белән идарә итә ала. Сатарга, җырларга биреп торырга мөмкин. Җырны бушка язып, ул җыр акча китермәскә тиеш дигән сүз түгел. Җыр – товар ул. Ул товар кебек үк кулланылырга, җырланырга, акча китерергә тиеш», - диде Зөфәр Хәйретдинов.