Журналист Габдерәхим вафат
Габдерәхим соңгы елларда «Акчарлак» газетасында эшләде.
(Казан, 17 апрель, «Татар-информ», Рәмис Латыйпов). Журналист Габдерәхим (Рөстәм Юнысов) вафат. Бу хакта «Татар-информ» журналистына аның туганы Рамил хәзрәт Юныс хәбәр итте.
Рөстәм Юнысов 1965 елның 4 февралендә туган. Казан театр училищесын тәмамлаган. Күпмедер вакыт Тинчурин театрында да эшләгән. Аның иң популяр роле — Дамир Сираҗиев куйган «Әйдә барыйк, кызлар карыйк» комедиясендә Әфләтун.
Габдерәхим — аның иҗади тәхәллүсе. Ул яңа форматта эшләгән беренче шәхси татар радиосы «Курай» диджее. Ул татар матбугатында шоу-бизнес турындагы гаугалы интервьюлары белән танылды.
Габдерәхим 2020 елның кышында фаҗигагә дучар булды, аның бармакларын кистеләр. Ул бу хакта бер ел элек «Интертат» сайтына интервьюсында сөйләгән иде.