Спорт 7 май 2017 20:40

"Зенит" волейболчылары "Алтылык финалы"н җиңүдән башлады

Владимир Алекно җитәкләгән командага җиңү өчен чын мәгънәсендә могҗиза тудырырга туры килде.

Скопировать ссылку

(Казан, 7 май, "Татар-информ"). Казанның "Зенит" волейбол командасы Мәскәүдә уза торган Россия чемпионаты "Алтылык финалы"ның беренче матчында җиңүгә иреште – Новосибирскиның "Локомотив" клубыннан өстен чыкты. Исәп – 3:2.

Әлеге матчка кадәр "Локомотив" командасы исәбендә бер җиңү бар иде инде. Кичә Новосибирск волейболчылары Сургутның "Газпром-Югра" командасыннан өстен чыкты (3:1). Шуңа да бүген кимендә 1 очко яулай "Локомотив"ка ярымфиналга юл ачачак иде. Шулай булып чыкты да: "Локомотив" бүген беренче ике партиядә ышанычлы җиңү яулады. Әмма "Зенит" командасы аларга сенсация ясарга мөмкинлек бирмәде – рәттән 3 партиядә җиңү яулап, уенны үз файдасына төгәлли алды.

Матчның иң нәтиҗәле уенчылары булып 21әр очко туплаган Максим Михайлов белән Вильфредо Леон танылды.

8 майда "Зенит" "Газпром-Югра" командасы белән очраша. Матч 16:00 сәгатьиә башлана.

Волейбол. Россия чемпионаты. "Алтылык раунды", "А" төркеме. "Зенит" (Казан) – "Локомотив" (Новосибирск) – 3:2 (20:25, 21:25, 25:16, 25:22, 19:17).

#"Зенит" волейбол командасы

Сәхифәләр

"Зенит" волейболчылары "Алтылык финалы"н җиңүдән башлады