"Зенит" волейбол командасының биш уенчысы Казаннан китә
Алар арасында команда капитаны Андрей Ащев та бар.
(Казан, 16 май, "Татар-информ"). Килешү вакыты чыгу сәбәпле, "Зенит" волейбол командасының 5 уенчысы Казаннан китә. Клуб алар белән килешүне озайтмады. Бу хакта клубның рәсми сайты хәбәр итте.
Китүчеләр арасында команда капитаны, блок куючы позициясендә чыгыш ясаучы Андрей Ащев та бар. Аннан тыш командадан бәйләүче уенчы Игорь Кобзарь, диагональ уенчы Денис Земченок, төгәлләүче уенчылар Евгений Сивожелез белән Владимир Мельник та китә.
Иң тәҗрибәлесе, әлбәттә, Евгений Сивожелез. Ул "Зенит" составында 2011 елдан бирле уйнады. Шул алты сезон эчендә "Зенит" өчен 249 матчта уенга чыкты:дүрт тапкыр Чепионнар лигасы (2012, 2015, 2016, 2017), биш мәртәбә Россия чемпионаты (2012, 2014, 2015, 2016, 2017) җиңүчесе булды, өч сезонда Россия кубогын яуларга булышты (2014, 2015, 2016).
