Апас районы якташлык җәмгыяте Татарстанда иң яхшысы дип танылды
«Татарстан Республикасы буенча «Апас» якташлык җәмгыяте» төбәк иҗтимагый оешмасы 2025 ел йомгаклары буенча якташлык җәмгыятьләре арасында үткәрелгән республика конкурсында беренче урынны яулады.
Татарстан Муниципаль берәмлекләр советында бәйгегә йомгак ясалды.
Якташлык җәмгыятьләре республикада 30 елдан артык эшләп килә. Алар Татарстан шәһәрләре һәм районнарында туып үскән, туган яклары белән элемтәне өзми торган, бер-берсенә ярдәм итүче һәм туган якны үстерүдә катнашучы кешеләрне берләштерә.
Бүген Казан һәм Чаллы шәһәрләрендә шундый дистәләгән берләшмә эшли. Татарстан Рәисе Рөстәм Миңнеханов җитәкчелегендәге республика җитәкчелеге дә якташлык җәмгыятьләрен үстерүне хуплый.
Фото: «Татарстан Республикасы муниципаль берәмлекләр советы» ассоциациясе