Зәйдә «Авылым гүзәллеге» проекты җиңүчеләрен котладылар
Зәйдә «Авылым гүзәллеге» проекты җиңүчеләрен котладылар. Гражданлык җәмгыятен үстерүгә Татарстан Республикасы Рәисе гранты ярдәмендә агымдагы елның март аенда интернет челтәрендә «Авылым гүзәллеге» проекты үткәрелде. Бу хакта «Зәй яңалыклары» хәбәр итә.
Проектның максаты — татар авыллары халкы арасында милли мирасны һәм халык иҗатын популярлаштыру. Әлеге марафоннар фестивалендә үзләренең туган җирләренең мәдәни мирасын саклау һәм аларны таныту белән кызыксынган 216 кеше катнашты, дип язалар Бөтендөнья татар конгрессы сайтында.
Зәй турында сөйләп проектта катнашкан кызлар да бар. Алар — Әхмәт авылыннан Гөлүзә Хамматова, Чыбыклыдан Роза Хәйретдинова, Куш-Елгадан Рәмзия Җиһаншина, Бигештән Рәмзия Закирова.
Бу көннәрдә әлеге проектта җиңү яулаганнарны тәбрикләү максатында районның Әхмәт авылына республика кунаклары килде. «Белем.ру» оешмасы директоры, «Татнет»ны үстерү фонды» коммерцияле булмаган җәмгыятен оештыручы һәм башкаручы директоры Раил Гатауллин һәм журналист Рәсимә Гарифуллина берочтан авылның мәдәни мирасы белән дә танышты.
«Кунакларга үзебезнең данлыклы гармунчы Фаит абый Сәитов турында сөйләдек, ул үзе дә 94 яшендә булуга карамастан чарада катнашты. Раиф абый Шәймәрданов эшләреннән күргәзмә оештырдык. Тырыш гаилә династияләрен күрсәттек. Авыл башындагы туганнар каберлегенә зират кылдык, мәчеттә булдык. Безнең авылның таш мәчетенең манарасы тынгысыз елларда да киселми калган. Бу мәчетнең тарихы кунакларны бик кызыксындырды», — дип сөйли Гөлүзә Хамматова.
Соңыннан «Авылым гүзәллеге» проектында җиңү яулаган Гөлүзә, Роза, Рәмзия ханымнарга җиңүче дипломнары тантаналы төстә тапшырылды.