Җәмгыять 27 ноябрь 2025 23:18

Зәй китапханәсендә Әниләр бәйрәме үтте

Скопировать ссылку

26 ноябрьдә Зәйнең Сөббух Рәфыйков исемендәге үзәк китапханәсендә «Сөмбелә» клубы әгъзалары катнашында «Ана- һәр нәрсәнең башлангычы» дип исемләнгән әдәби-музыкаль кичә узды. Бу хакта «Зәй-информ» яза.

Китапханәчеләр кунакларны котлап, бәхет, сәламәтлек һәм иминлек теләде. Бу бәйрәмнең килеп чыгышына һәм башка илләрдә ничек билгеләп үтелүенә тукталдылар. Әниләргә багышлап укылган шигырьләр бәйрәм кунакларына мәдхия булып яңгырады. «Ромашка таҗлары», «Хәтер капчыгы», «Ашларыгыз тәмле булсын» кебек уеннарда сөмбеләлеләр бик теләп катнаштылар. Шулай ук әниләр темасына язылган җырларны алар бергәләп тә башкардылар, бәйрәм белән бәйле булган кызыклы вакыйгалар белән уртаклаштылар.

Чарага килүчеләр бәйрәмгә багышлап ясалган китап күргәзмәсе белән таныштылар. Кичә чәй табыны артында дәвам итте.

Сәхифәләр

Зәй китапханәсендә Әниләр бәйрәме үтте