Заһитова һәм Поветкин БРИКС уеннары илчеләре итеп билгеләнде
Бүген Петербург халыкара икътисади форумы барышында фигуралы шуу буенча Олимпия чемпионы Алинә Заһитова БРИКС уеннары илчесе итеп билгеләнде.
Аңа Татарстанның спорт министры Владимир Леонов сертификат тапшырды, дип Санкт-Петербургтан хәбәр итә «Татмедиа» матбугат һәм массакүләм коммуникацияләр буенча республика агентлыгының Мәскәүдәге хәбәрчесе Динә Газалиева.
Шулай ук булачак турнирның илчесе итеп авыр үлчәү категориясендә чыгыш ясаган Россия боксеры, Вологда өлкәсе вице-губернаторы Александр Поветкин сайланган.
Искәртик, БРИКС илләре уеннары 12-23 июньдә Казанның 16 спорт объектында узачак. 97 илдән 5 меңгә якын спортчы килер дип көтелә. Ярышлар 27 спорт дисциплинасы буенча узачак. 387 комплект медаль уйнатылачак.