Ун ай эчендә Казанда 150дән артык законсыз сәүдә объекты сүтелгән
2025 елның гыйнварыннан октябренә кадәр Казанда стационар булмаган 158законсыз сәүдә объекты сүтелгән – бу узган елның шул чорына караганда 30га күбрәк. Моннан тыш, 53 автофургон конфискацияләнгән, бу узган елгы күрсәткечтән (36 берәмлек) шактый артып китә. Бу хакта мэриядән хәбәр иттеләр.
Шәһәр башкарма комитетының Кулланучылар базары комитетында билгеләп үтүләренчә, элегрәк бер объектны сүтүгә өч айга якын вакыт киткән. Хәзер процесс тизләтелгән: мэрия порталында ай саен гамәлдәге килешүләр нигезендә урнаштырылган стационар булмаган сәүдә объектларының исемлеге урнаштырыла. Исемлектә булмаган теләсә кайсы павильон яки киоск автомат рәвештә законсыз дип таныла һәм хуҗаны алдан кисәтмичә дә, муниципаль җир контроле акты алынганнан соң ук сүтелергә мөмкин.
Бүгенге көндә Казанда ел әйләнәсе эшләүче стационар булмаган сәүдә объектларын урнаштыру буенча 691 урынны үз эченә алган схема гамәлдә, эшкуарлар белән 449 килешү төзелгән. Шуның белән бергә, стационар сәүдә объектлары саны арту хисабына мондый объектларның саны кимү тенденциясе күзәтелә.