Авыл 18 ноябрь 2018 08:43

Зәйдә үзара салым буенча референдумда биш йөзәр сум җыю өчен тавыш бирәләр

Үзара салым программасы буенча халыктан җыелган һәр сум өчен республика бюджетыннан дүрт сум бүлеп бирелә.

Скопировать ссылку

(Зәй, 18 ноябрь, "Татар-информ", "Зәй офыклары"). Бүген Зәй районының 22 авыл җирлегендә үзара салым буенча референдум уза. Авыл халык биш йөзәр сум җыю өчен тавыш бирә. Зәй муниципалитеты программада дүртенче ел катнаша. Бу хакта "Зәй офыклары" газетасы хәбәр итә.

Татарстанда бу программа 2013 елдан гамәлдә. Үзара салым программасы буенча халыктан җыелган һәр сум өчен республика бюджетыннан дүрт сум бүлеп бирелә.

Башта авыл халкы 200 әр сум, аннан 300 әр сум җыйды. Хәзер 500 әр сум җыя. Шул рәвешле, районда быел барлык җирлекләрдәге халык тарафыннан 3 миллион сумга якын акча җыелган. Республика бюджетыннан 10 миллион сумнан артык акча бүлеп бирелгән.

Бу акчалар авыллардагы мәсьәләләрне чишәргә мөмкинлек бирде. Алар юлларны, зиратларны төзекләндерүгә, урамнарны яктыртуга, территорияләрне яшелләндерүгә, булган һәйкәлләрне яңартуга, яңаларын куюга, чишмәләрне төзекләндерүгә һ.б. тотылды.

Авыл халкы әлеге программаның мөһимлеген аңлап, үзара салым буенча референдумда актив катнаша. Муниципалитет авылларында әле күп эшләр башкарасы бар бит.

#референдум #үзара салым

Сәхифәләр

Зәйдә үзара салым буенча референдумда биш йөзәр сум җыю өчен тавыш бирәләр