Зәйдә көрәшчеләр Бөтенроссия турнирына җыелды
Бил алышларда 200 дән артык спортчы катнаша.
(Зәй, 3 февраль, "Татар-информ", "Зәй офыклары", Рәзимә Кашапова). Зәйнең “Яшьлек” боз сараенда элекке район башлыгы Ринат Фәрдиев истәлегенә көрәш буенча Бөтенроссия турниры ачылды. Бу турыда җирле басма хәбәр итә.
Ачылу тантанасында район башлыгы Разиф Кәримов, Татарстан спорт министрының беренче урынбасары Хәлил Шәйхетдинов, Россия көрәш федерациясенең вице - президенты Равил Ногманов, Татарстан көрәш федерациясе башкарма директоры Равил Хәйруллин һәм башка мәртәбәле кунаклар катнашты.
Мәртәбәле бил алышка Карачай-Черкесия, Киров, Башкортстан, Татарсттан, Удмуртия, Мари Эл, Мордовия, Самара, Ульян, Яраслау, Ханты-Мансийск автономияле, Ямал милли округыннан да көрәшчеләр килде. Бил алышларда 200 дән артык спортчы катнаша. Турнир ике көн дәвамында барачак.