Үз клибының Аврил Лавин тарафыннан өлешчә кабатлануына Эльмира Кәлимуллинаның исе китмәгән
Эльмира Кәлимуллина, авторлык хокукларын яклап, судлашып йөрмәячәк.
(Казан, 27 февраль, «Татар-информ», Рузилә Мөхәммәтова). Аврил Лавинның Head Above Water җырына ясалган яңа клибы Эльмира Кәлимуллинаның 2015 елда чыккан клибына аваздаш. Әмма татар җырчысы моңа сөенгән генә. Бу хакта ул бүген «Татар-информ»да үткәрелгән матбугат конференциясендә әйтте.
“Бу минем өчен көтелмәгән хәл булды. Моны охшашлык дип кенә дә әйтеп булмый. Безнең клиптан аерым кадрлар алынган, сюжет линиясе дә кабатланган. Мин моңа сөендем”, - диде ул әлеге теманы шәрехләп.
Эльмира Кәлимуллина, авторлык хокукларын яклап, судлашып йөрмәячәк. “Минем башка әһәмиятлерәк эшләрем бар. Мин иҗат белән шөгыльләнәм”, - диде ул.
- Эльмира Кәлимуллинаның “Будда” җырының премьерасы 2014 елның августында булган. Клип 2015 елның маенда чыккан. Текст һәм музыка авторы – Артем Михаенкин.
Татарстанның атказанган артисты Эльмира Кәлимуллина хәзерге вакытта яңа концерт программасын әзерли. “Ул “Төп роль” дип атала.
Элмира Кәлимуллинаның концерт туры 15 мартта Казанда башлана һәм 21 мартта туган шәһәре Түбән Камада тәмамлана. 17 мартта җырчы Чаллыда һәм 20 мартта Әлмәттә чыгыш ясаячак.