Ютазының Урыссу бистәсендә Сабантуйга бүләк җыйдылар
Ютазы районы мәдәният йорты хезмәткәрләре милли киемнәрдә, гармун моңы астында, күңелле һәм шаян җырлар белән Сабан туена бүләк җыйды. Районда бу йоланы «Сөрән җыю» дип тә йөртәләр. Бу хакта «Ютазы таңы» сайтында хәбәр ителә.
«Сөрән жыю» - халкыбызның борынгыдан килгән күркәм гореф-гадәте. Менә бүген дә, шул йолага тугры калып, Сабан туе хәбәрчеләренең шат авазларын ишетеп, бистә халкы, үз бүләкләрен тапшырды. Кайберәүләр хәтта Сабан туен оештыручыларга багышлап, үзләре иҗат иткән шигырьләрен дә укып бирде. Ә сөрән җыючылар аларны биергә чакырды.
«Шулай итеп, бу атна ахырында, шимбә көнне, табигатьнең ямьле почмагына урнашкан Каклыкул авылы янында барыбызның да яраткан милли бәйрәме – район Сабан туе уза», – диелгән хәбәрдә.