Ютазы хезмәт алдынгылары авыл хуҗалыгы хезмәтчәннәре бәйрәменә җыелды
Хезмәт алдынгылары бүләкләнде.
(Ютазы, 31 октябрь, "Татар-информ", "Ютазы таңы", Ильмира Галиева). Узган шимбә иртәсендә “АгроМир” җәмгыятенең хезмәт алдынгылары авыл хуҗалыгы хезмәтчәннәре бәйрәменә җыйналды. Бу турыда район басмасы хәбәр итә.
“АгроМир” җәмгыятенең күзәтчелек советы рәисе Сирин Галиев: "Әлбәттә, бу безнең уртак хезмәт җимеше. Элек-электән үк җир-ана күмәк хезмәтне яраткан, аны аңлап, аның таләпләрен тоеп, бакканы үз иткән. Туган хуҗалыгыбызда күркәм уңышларга ирешеп эшлибез", - диде.
Быел да үсемлекләрне тәрбияләү, аларны төрле авырудардан һәм корткычлардан саклау һәм яклау максатында күп төрле агротехнологик чаралар уздыралар.
Менә шушы эшләрне җиренә җиткереп башкарган, туган хуҗалыкларының финанс-икътисадый торышын ныгытуга үзләреннән саллы өлеш керткән фидакарьләр бу иртәдә бүләкләнде.