Юлда карга батып калган иномаркадагы балалы гаиләгә Чаллы коткаручылары ярдәм иткән
Чаллы коткаручылары да «Инфинити» автомобилен кар көртеннән чыгара алмаган.
(Казан, 31 март, «Татар-информ»). Татарстанда балалы гаилә утырган иномарка юлда карга батып калган. Аларны коткаручылар машинасына утыртып, Чаллыга озатканнар. Бу хакта Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр иттеләр.
«Кичә кич «Искра» бакчачылык ширкәтендә «Инфинити» автомобиле карга батып калган. Машинада өлкәннәр һәм җиде яшьлек малай була, алар вакыйга урыныннан мөстәкыйль рәвештә китә алмаган», – дип ачыкладылар Гадәттән тыш хәлләр министрлыгында.
Урынга килгән Чаллы коткаручылары машинаны кар көртеннән чыгара алмаган. Баланы һәм әти-әнисен шәһәргә алып кайтканнар. Анда аларны туганнары, үз машиналарында килеп, каршы алган.
