Җәмгыять 31 март 2021 16:23

ЮХИДИ машина йөртүчеләрне буран вакытында аеруча игътибарлы булырга өнди

Киләсе тәүлектә республикада көчле җил һәм буран көтелә.

Скопировать ссылку

(Казан, 31 март, «Татар-информ»). Татарстанның ЮХИДИ хезмәте буран вакытында машина йөртүчеләрне игътибарлы булырга һәм юл хәрәкәте кагыйдәләрен үтәргә өнди.

Синоптиклар фаразлаганча, киләсе тәүлектә республикада буран һәм секундына 22 метр тизлектә исә торган көчле җил көтелә.

Начар һава торышы шартларында Татарстан ЮХИДИ хезмәте машина йөртүчеләргә өйдән чыкканчы автомобильнең төзеклеген тикшерергә кирәклеген искә төшерә. Юлда кискен маневрлар ясамаска, хәрәкәтнең оптималь тизлеген сайларга кирәк.

Машина йөртүчеләргә һәм пассажирларга иминлек каешларын эләктерергә, ә балаларны бары тик махсус утыргычларда гына йөртергә кирәк.

Буран һәм көчле җил җәяүлеләргә дә куркыныч тудырырга мөмкин. Бары тик «зебрадан» һәм светофорның яшел уты янганда гына юл аркылы чыгарга, шулай ук машина йөртүчеләрнең җәяүлеләрне уздыруына инанырга кирәк. Киемгә яктылыкны чагылдыра торган элементлар беркетелгән булырга тиеш.

Юлларда штаттан тыш хәлләр туган очракта 8-843-533-38-88 телефонына шалтыратырга була.

Сәхифәләр

ЮХИДИ машина йөртүчеләрне буран вакытында аеруча игътибарлы булырга өнди