ЮХИДИ балалар катнашында булган һәлакәтләр саны арткан районнарны атады
Юл-транспорт һәлакәтләренең иң еш сәбәпләре — тизлек режимын үтәмәү һәм каршы як юлга чыгу.
(Казан, 10 июнь, «Татар-информ», Зилә Мөбәрәкшина). Юл-транспорт һәлакәтләре күп булган районнар арасында Аксубай, Алексеевск, Әтнә, Югары Ослан, Зәй, Кайбыч, Питрәч, Балык Бистәсе, Чирмешән һәм Чистай районнары бар. Бу хакта «Татар-информ» мәгълүмат агентлыгында узган матбугат очрашуында республика Дәүләт автоинспекциясе башлыгы урынбасары Дамир Бикмөхәммәтов хәбәр итте.
«Пассажир-балалар һәлак булган юл-транспорт һәлакәтләре Әлмәт, Мөслим, Питрәч һәм Чистай районнарында теркәлгән. Шуларның өчесендә машина йөртүчеләр үзләре гаепле. Бу хәлләр еш кына тизлек режимын үтәмәү һәм каршы як полосага чыгу аркасында була», — диде Бикмөхәммәтов.