Югары Ослан районында юл һәлакәтендә хатын-кыз вафат булган
Руль артында хатын-кыз булган машина каршы полосага чыккан һәм икенче автомобильгә килеп бәрелгән.
(Казан, 7 февраль, “Татар-информ”). Югары Ослан районында юл һәлакәте булган. Һәлакәт аркасында бер кеше һәлак булган, тагын икесенең сәламәтлегенә зыян килгән. Бу хакта “Татар-информ” мәгълүмат агентлыгына Россия Гадәттән тыш хәлләр министрлыгының Татарстан Республикасы буенча Баш идарәсе матбугат хезмәте хәбәр итте.
Юл һәлакәте бүген Казан – Ульяновск юлының 16 нчы чакрымында иртәнге сәгать җидедә булган. Чуашиядән булган 36 яшьлек хатын-кыз "Хендэ Солярис” автомобилендә, алда барган транспорт чарасын узып китү нияте белән, каршы як хәрәкәт полосасына чыккан һәм йөзгә-йөз “Рено Дастер” машинасына килеп бәрелгән.
Һәлакәт аркасында "Хендэ Солярис” руле артындагы хатын-кыз белән "Рено Дастер"ның 63 яшьлек йөртүчесенең сәламәтлегенә зыян килгән. Һәлакәт урынына килгән янгын сүндерүчеләр махсус кораллар ярдәмендә зыян күргән хатын-кызга машинадан чыгарга ярдәм иткән һәм аны табибларга тапшырган.
Ә "Хендэ Солярис” машинасындагы пассажир хатын-кызның гомере өзелгән.
