Югары Ослан районында спорт катеры аздан гына батмый калган
Гадәттән тыш хәл Идел елгасында – Югары Ослан авылы һәм Казан арасында булган.
(Казан, 13 июль, «Татар-информ»). Югары Ослан районында спорт катеры аздан гына батмый калган. Бу хакта «Татар-информ» агентлыгына Россия Гадәттән тыш хәлләр министрлыгының ТР буенча Баш идарәсе матбугат хезмәтеннән хәбәр иттеләр.
Кичә 112 бердәм номерына Идел елгасында – Югары Ослан авылы һәм Казан арасында Speedster дүрт урынлы спорт катерының төбе тишелеп, бата башлавы хакында хәбәр килгән. Катерда ике ир-ат булган.
Урынга беренчеләрдән булып 112нче янгын-коткару часте хезмәткәрләре килеп җиткән. Балыкчыларның катер белән якындагы утрауга таба йөзеп барган чагында бәлагә юлыгуы ачыкланган. 2нче зона янгын-коткару отряды һәм Кече суднолар буенча дәүләт инспекциясе хезмәткәрләре катерны һәм ир-атларны яр буена алып чыккан.
Исерек хәлдәге катер йөртүчегә карата, медицина тикшерүе үтүдән баш тартканы өчен, административ беркетмә төзелгән.
