Җырчы Зуля Камалова вафат булган
Австралиядә яшәүче җырчы, Татарстанның атказанган артисты Зуля Камалова 18 сентябрьдә 55 яшендә вафат булган. Соңгы вакытта ул онкология авыруы белән көрәште.
Җырчының үлеме турында Facebook (Meta корпорациясенеке, Россиядә экстремистик оешма дип табылган һәм тыелган) социаль челтәрендә музыкаль продюсер Александр Чепарухин яза. Бу турыда «Татар-информ» хәбәр итте.
«Зуля бүген бездән китте. 55нче туган көннән соң. Соңгы сәгатьләрендә аның белән кызы Зифа һәм ире Эндрю булды. Мин аның белән соңгы тапкыр узган атна башында сөйләштем. Ул санаулы көннәре калуын аңлады, ләкин могҗизага өметен өзмәде», – дип яза Чепарухин.
55 яшьлек туган көнендә, 8 августта, Зуля Камалова онкология авыруыннан дәвалануын үзе социаль челтәрләрдә хәбәр итте, хастаханә палатасыннан фото күрсәтте. Ул экстрен операция кичерүен һәм метастазлар белән көрәшүен әйтте. «Гафу итегез, начар хәбәрләр, фараз өметләнерлек түгел», – дип язды ул.
- Австралиядә яшәүче җырчы Зуля Камалова рак белән авырый: «Китәргә туры килсә, китәчәкмен»
-
Яман шеш белән көрәшүче Зуля Камалованың апасы: «Сеңлем яшәргә тели»