Җырчы Сәидә Мөхәммәтҗанова Заһитова һәм Вәлиева белән боз тамашасында очрашты
Кичә «Татнефть Арена»да «Бозда чемпионнар» тамашасы булды.
(Казан, 3 апрель, «Татар-информ»). «Голос.Дети» шоуның икенче сезоны финалисты Сәидә Мөхәммәтҗанова «Бозда чемпионнар» тамашасында булган һәм Instagram битендә фигуралы шуу осталары Алинә Заһитова һәм Камилә Вәлиева белән бергә төшкән фото урнаштырган.
«Бүген тагын бер хыялым тормышка ашты. „Бозда чемпионнар“ тамашасына бардым, ул бик шәп булды! Барлык катнашучыларга бәйрәм өчен рәхмәт!» — дип язган җырчы.
Тамаша кичә «Татнефть Арена» бозында узды. Анда Олимпия уеннарының ике тапкыр көмеш призеры Евгения Медведева, дөнья чемпионы Анна Щербакова, Европа чемпионы Алена Косторная, яшүсмерләр арасында дөнья чемпионы — Казан кызы Камилә Вәлиева, дөнья чемпионатының көмеш призеры Элизабет Турсынбаева һәм Европа чемпионатының бронза призеры Морис Квителашвили катнашты.