Мәдәният 14 март 2017 15:47

Җыр сәнгатендә нота танымаганнар күбәйде - Әнвәр Шәрәфиев

Зәвыксыз җырчыларны пропагандалаудан туктарга вакыт, - дип саный композитор,Г. Тукай премиясенә кандидат Әнвәр Шәрәфиев.

Скопировать ссылку

(Казан, 14 март, «Татар-информ», Мөршидә Кыямова) Югары музыкаль белем алган белгечләр читтәрәк кала шикелле. Нота да танымаганнар зур сәхнәләрдә, халык каршында мәйдан тота, дип белдерде «Татар-информ» хәбәрчесенә Татарстанның атказанган сәнгать эшлеклесе, танылган композитор Әнвәр Шәрәфиев.

«Сәнгать дөньясында нота танымаган җырчылар күбәйде. Ә консерватория дипломы алганнарны заказлар биреп эшләтергә кирәк. Иҗади дискуссияләрдә катнаштырырга. Әгәр дә композитор язганны ошатып бетермәгән җырчылар бар икән, рәхим итеп үз аңлатмаларын, киңәшләрен бирсеннәр. Профессионалларга юнәлеш тотып эшләргә кирәк. Ә зәвыксыз җырчыларны пропагандалаудан туктарга вакыт. Мин беләм шундый җырчыларны, сөйләсәң ышана торган түгел: нотаның нәрсә икәнен белми, ә үзе «Татарстанның атказанган артисты» исемен йөртә. Берәү белән җыр турында сөйләшә башладык, әсәрләрем арасыннан ошаганын сайлап ал дип, җыентыгымны кулына тоттырдым, ә ул : «Юк, Әнвәр абый, мин ноталар карап өйрәнә алмыйм, мин слух буенча гына өйрәнәм. Сез мине уйнап өйрәтсәгез, җырлый алам», - ди. Бөтен татар дөньясы буйлап гастрольдә йөрүче җырчы үзе... Ә иң кызганычы шул: мондый «атказанганнар» арабызда бер генә түгел, бит! Аларның фамилияләрен атамыйм, аларны белә торганнардыр...», - ди Әнвәр Шәрәфиев.

Быел Г.Тукай премиясенә кандидатлар исемлегендә татарның танылган көйязары Әнвәр Шәрәфиев тә бар. Әлеге дәрәҗәле премиягә аның «Сандугач», «Чулпан Йолдыз» һәм «Наз» дигән музыкаль әсәрләре тупланган җыентыклары тәкъдим ителде.

#Г.Тукай исемендәге дәүләт бүләге #композитор Әнвәр Шәрәфиев

Сәхифәләр

Җыр сәнгатендә нота танымаганнар күбәйде - Әнвәр Шәрәфиев