Җәмгыять 3 ноябрь 2005 14:42

Йошкар-Олада татар мәдәният үзәге “Бердәм гаилә” дигән дуслык кичәсе уздыра

Скопировать ссылку

(Казан, 3 ноябрь, “Татар-информ”, Гөлназ Шәйхи). Бүген Йошкар-Олада Халыкларның бердәмлеге көне һәм Мари Республикасы төзелүгә 85 ел тулу уңаеннан республиканың татар мәдәни үзәге “Бердәм гаилә” дигән дуслык кичәсе үткәрергә җыена. Әлеге чарада Бөтендөнья татар конгрессы Башкарма комитеты рәисенең беренче урынбасары Ренат Вәлиуллин да катнашачак.

Марий Эл Республикасында 50 меңгә якын татар гомер итә. Республиканың башкаласы Йошкар-Олада яшәүче милләттәшләребезнең саны 12 меңгә, Волжск шәһәрендә 10 меңгә якын. Бәрәңге, Звенигово, Мари-Төрек, Медведев, Морки районнарында да татарлар күпләп яшиләр.

90енчы еллар башында кардәшләребез татар мәдәни үзәге һәм “Туган тел” дип аталган җәмгыять төзиләр. Ә 2004 елда татар милли-мәдәни мохтәрияте оеша. Республиканың 19 мәктәбендә татар теле укытыла. Морки районында “Яшьлек”, “Ялкын”, Бәрәңге районында “Алтын ай” ансамбльләре иҗат итә. Бәрәңгедә “Безнең тормыш” дигән район газетасы нәшер ителә. Бөтендөнья татар конгрессы Башкарма комитеты Марий Элнең татар милли-мәдәни мохтәрияте белән берлектә, 2004 елда Йошкар-Ола шәһәрендә гомумфедераль Сабан туен үткәрде.

Сәхифәләр

Йошкар-Олада татар мәдәният үзәге “Бердәм гаилә” дигән дуслык кичәсе уздыра