Җәмгыять 23 апрель 2020 10:27

Өйдән чыгу өчен цифрлы пропускларны Россиянең 21 төбәгендә гамәлгә кертәчәкләр

Скопировать ссылку

(Казан, 23 апрель, «Татар-информ»). Коронавирус инфекциясе таралуга бәйле рәвештә цифрлы пропусклар бирү буенча федераль платформаны Россиянең 21 төбәгендә гамәлгә кертәчәкләр. Бу хакта РИА Новости агентлыгы РФ Цифрлы үсеш, элемтә һәм гаммәви коммуникацияләр министрлыгына сылтама белән хәбәр итә.

«Цифрлы пропусклар бирү буенча федераль платформа эш бирүчеләргә дәүләт хезмәтләре бердәм порталында юридик затның шәхси кабинеты аша даими цифрлы пропусклар алу өчен хезмәткәрләр исемлеген тапшырырга мөмкинлек бирә», - диелә хәбәрдә.

Заявканы тикшергәннән соң QR-кодлар рәвешендәге даими цифрлы пропусклар формалаштырыла, алар дәүләт хезмәтләре порталында хезмәткәрләрнең шәхси кабинетларына һәм электрон почтага җибәрелә.

Беренче чиратны гамәлгә кертү кысаларында федераль платформага өстәмә рәвештә Үзәк федераль округның җиде төбәге (Тула, Кострома, Тамбов, Владимир, Ярославль, Орел һәм Белгород өлкәләре) кушылачак. Киләсе атнада платформаны Себер, Идел буе, Ерак Көнчыгыш һәм Төньяк Кавказның 14 төбәгендә гамәлгә кертә башларга ниятлиләр.

Татарстан Республикасында өйдән чыгу өчен цифрлы пропускны СМС-сервис ярдәмендә яки интернет аша алырга мөмкин.

#Үз-үзеңне изоляцияләү #Смс-пропуск

Сәхифәләр

Өйдән чыгу өчен цифрлы пропускларны Россиянең 21 төбәгендә гамәлгә кертәчәкләр