Язучылардан Тукай премиясенә бер кандидат - Флера Гыйззәтуллинаны күрсәтү тәкъдим ителде
Татарстан Язучылар берлегенең Шигърият остаханәсе Тукай премиясенә шагыйрә Флера Гыйззәтуллинаны тәкъдим итте.
«Флера Гыйззәтуллинага Тукай премиясен бирми яшәү дөрес түгел. Без инде ничә еллардан бирле сузып килдек. Флера апа ирләр дә яза алмаганны яза. Аның язганнары йөрәге татар дип язган кеше өчен үрнәк иде», - диде Вахит Имамов остаханәләренең берләштерелгән утырышында Шигърият остаханәсе тәкъдимен куәтләп.
«Ничә еллар дәвам иткән гаделсезлекне өзеп һичшиксез Флера апаны тәкъдим итәргә кирәк. Булдырып булса, Язучылар берлегеннән бер генә кандидат үткәрсәк иде. Аны Ркаил Зәйдулла комиссия утырышында яклап чыгарлык булсын», – диде ул.
«Бер генә кешене тәкъдим итсәк, бу премия булачак. Мин сезне шуңа кыстыйм», – диде Вахит Имамов.
Язучылар берлегенең Проза остаханәсе Тукай премиясенә кандидат итеп Рәфкать Кәрами һәм Марат Әмирханов кандидатларын тәкъдим итте.
Әлеге кандидатлар, шулай ук, Чаллы белән Әлмәт бүлекчәләренең кандидатлары Идарә утырышында каралачак.
Утырышка бүген Флера Гыйззәтуллина үзе дә килгән иде.