Язгы чорда республикада 20 млн төп агач утыртылган
Татарстан Урман фонды гади нарат, Европа чыршысы, Себер карагае, имән, каен кебек агач үсентеләре белән тулыландырылды.
(Казан, 23 май, "Татар-информ"). Татарстанда язгы агач утырту чоры тәмамланды. Урман хуҗалыгында эшләүчеләр аны "урман культуралары сезоны" дип йөртә. Бу хакта Татарстан Урман хуҗалыгы министрлыгы матбугат хезмәте хәбәр итә.
Татарстанда язгы агач утырту чоры тәмамланды. Бу сезонда 4 мең га мәйданда 20 млн төп урман культуралары утыртылган. Татарстан Урман фонды гади нарат, Европа чыршысы, Себер карагае, имән, каен кебек агач үсентеләре белән тулыландырылды.
Хәзерге вакытта басу-кырларны, канауларны, елга яр буйларын табигатьнең тискәре йогынтысыннан саклый торган агач үсентеләре утырту тәмамланып килә. Быел андый үсентеләр тулаем 1813 га мәйданда утыртылган. Урман питомникларында 16,0 га мәйданда орлык чәчү төгәлләнде. Агач утырту эшләре көз көне дәвам иттереләчәк, дип хәбәр итә министрлык матбугат хезмәте.