Язгы чакырылышта Татарстаннан 4 меңләп егет хәрби хезмәткә алыначак
Республикадан егетләрне хәрби частьләргә 17 апрельдән озата башлау планлаштырыла.
(Казан, 31 март, “Татар-информ”, Лилия Локманова). 1 апрельдән Россиядә, шул исәптән Татарстанда да, гражданнарны хәрби хезмәткә чакыруның язгы кампаниясе башлана. Быел Татарстаннан барлыгы 4 меңгә якын егет хәрби хезмәткә алыначак. Бу хакта бүген “Татар-информ” мәгълүмат агентлыгы уздырган матбугат очрашуында Татарстан Республикасының хәрби комиссары Сергей Погодин хәбәр итте.
Гадәт буенча, язгы чакырылыш 15 июльгә кадәр дәвам итәчәк. Быел ил күләмендә барлыгы 142 мең егет хәрби хезмәткә алыначак. Көзге чакырылышта аларның саны 10 меңгә күбрәк булган.
“Бу чакырылышта 1990-1999 елда туып, хәрби чакырылышны кичектерү мөмкинлеге булмаучылар хәрби хезмәткә алыначак. Татарстаннан егетләрне хәрби частьләргә 17 апрельдә җибәрә башлау планлаштырыла”, – диде Сергей Погодин.