Яшел Үзәндә 93 яшьлек әби янып үлгән
Янгын кичә Комаров урамындагы 22нче йортта чыккан.
(Казан, 4 декабрь, «Татар-информ»). Яшел Үзәндә 93 яшьлек әби янып үлгән. Бу хакта «Татар-информ» агентлыгына Россия Гадәттән тыш хәлләр министрлыгының ТР буенча Баш идарәсе матбугат хезмәтеннән хәбәр иттеләр.
«Комаров урамындагы алты катлы йортның беренче катында янгын чыгуы турындагы хәбәр 112 бердәм номерына кичә килгән», - дип төгәллек керттеләр Россия Гадәттән тыш хәлләр министрлыгының ТР буенча Баш идарәсе матбугат хезмәтендә.
Фатирда 3 квадрат метр мәйданда мебель һәм әйберләр янган. Ут белән көрәшүчеләр янгынны сүндергән вакытта бүлмәдә 93 яшьлек әбинең мәетенә юлыккан.
Янгын электр җиһазларыннан файдалану кагыйдәләрен бозу сәбәпле чыккан дип фаразлана.
