Яшел Үзән районындагы боз кичүе ачылды
Боз кичүе юлны 58 тапкыр кыскартырга мөмкинлек бирә.
(Казан, 11 декабрь, “Татар-информ”). Бүген Яшел Үзән – Нижние Вязовые (Түбән Карамалы) боз кичүе рәсми рәвештә ачылды. Бу хакта Кешеләрнең судагы иминлеген тәэмин итү бүлеге җитәкчесе - Татарстанның кече суднолар буенча баш дәүләт инспекторы Юрий Венедиктов хәбәр итте.
Татарстанның Гадәттән тыш хәлләр министрлыгы хезмәткәрләре Яшел Үзән районында Иделдәге бозның калынлыгын тикшерде. Ул 20-25 см тәшкил итә һәм куркынычсызлык таләпләренә дә туры килә.
"Быел Спас һәм Мамадыш районнарындагы боз кичүләрендә суга бату буенча ике очрак теркәлде. Шунлыктан Гадәттән тыш хәлләр министрлыгы боз кичүләренә аеруча игътибарлы”, - диде Юрий Венедиктов.
Яшел Үзән районындагы кичүнең озынлыгы 1200 метр. Ә урау юл аша узу 70 км. Ул кичүгә караганда 58 тапкыр озынрак. Боз кичүе машина йөртүчеләргә вакытны экономияләргә булыша.
Машина йөртүчеләр, кичү аша чыкканда, билгеле таләпләрне үтәргә тиеш. Куркынычсызлык каешы эләктерелмәскә тиеш, тизлек режимын һәм машиналар арасындагы дистанцияне сакларга кирәк.
Яшел Үзән районындагы боз кичүе кар чистарту техникасы һәм коткару җайланмалары белән тәэмин ителгән. Ул һава шартлары мөмкинлек биргәнгә кадәр эшләячәк.