Җәмгыять 27 июль 2016 11:46

Яшел Үзән районы Олы Ачасыр авылы халкы үз газетасын булдырган

Авыл кешеләренең социаль челтәрдә үз төркеме дә бар

Скопировать ссылку

(Казан, 27 июль, “Татар-информ”). Яшел Үзән районының Олы Ачасыр авылының хәзер үз вакытлы матбугаты - “Безнең авыл гәҗите” бар. Яңа газета чыгуы турындагы хәбәрне район исемен йөрткән басма урнаштырган.

Июль аенда гына чыга башлаган айлык иҗтимагый газетаның баш мөхәррире Марат Гатиятуллин сүзләренә караганда, бу басманы интернеттан да укырга, сатып та алырга була. Күптән түгел чыккан 1 нче номерында ул, укучыларына мөрәҗәгать итеп, авылның иң мөһим вакыйгаларын, гайбәтләрне, туган көннәр турындагы хәбәрләрне, кайгылы хәбәрләрне җиткереп барырга тырышырбыз, шул ук вакытта кайберәүләрне кармакка да эләктергәләрбез, ди.

Газетада игълан да бастырылган. Аерым алганда, 30 июльдә кичен авылның “Бәйрәш” чишмәсе янында “Саф чишмәләр иле – авылым” дип исемләнгән бәйрәм үткәрелә. Оештыручылар кайнар чәй, коймак белән сыйлап, төрле уеннар, дискотека, салют һәм концерт вәгъдәли.

Авыл кешеләре виртуаль дөньяда да шактый актив. Җирле газетада хәбәр ителгәнчә, социаль челтәрләрнең берсендә “Без бит Ачасырлар” төркеме оешканга 24 июльдә 1 ел тулган.

Сәхифәләр

Яшел Үзән районы Олы Ачасыр авылы халкы үз газетасын булдырган