Яшел Үзәндә чит төбәкләрдәге татар журналистларына акча эшләү юлларын күрсәттеләр

Яшел Үзәндә Бөтенроссия татар журналистлары форумы делегатларына журналистикада акча эшләү юлларын, уңыш серләрен күрсәттеләр.

24-26 октябрьдә Татарстанда Бөтенроссия татар журналистлары форумы уза. Кунаклар 25 октябрьдә көн буе Яшел Үзәндә булды. Көннең беренче яртысында алар Каюм Насыйрига бәйле истәлекле урыннар белән танышса, икенче яртысында «Татмедиа» җәмгыяте үткәргән тәҗрибә уртаклашу чарасында катнашты.

«Мондый очрашулар гадәти эшкә әйләнеп китте. Ел саен шулай күрешәбез. Без моның өчен Бөтендөнья татар конгрессына бик рәхмәтле. Сезнең белән аралашу безне дә урыннан кузгатып, чит төбәкләрдәге татар басмалары ничек һәм нинди ихтыяҗлар белән яшәгәнен күрергә мөмкинлек бирә», – дип сәламләде Татарстан кунакларын «Татмедиа»ның медиа директоры Алсу Исмәгыйлева.

«Яшел Үзән» газетасының баш мөхәррир урынбасары Алия Гаязова Яшел Үзән районы татарлары тормышы, редакция эшчәнлеге, газета чыгару үзенчәлекләре турында тәфсилләп сөйләде. Аның сүзләренчә, «Яшел Үзән» – ул районда чыгучы 28 еллык тарихы булган бердәнбер татар басмасы. Редакция Разил Вәлиев инициативасы һәм тырышлыгы белән ачылган булган. Моңарчы атнага өч мәртәбә чыккан газета, почта чыгымнарын киметү хисабына язылу бәясен саклап калу өчен, быелдан бер тапкыр чыгуга калган. Бу алым белән редакция укучысын һәм басманың битләр санын саклый алган.

«Татмедиа» җәмгыяте карамагында чыга торган журналлар, китаплар, открыткалар «Озон», «Вайлдберриз», «Яндекс Маркет» кебек интернет-кибетләрдә сатыла торган популяр товарга әйләнгән. Бу нәтиҗәгә ирешү юллары белән «Татмедианың» ваклап сату департаменты белгече Гөлназ Кадыйрова таныштырды. Аның сүзләренчә, татар басмаларына, интернет-кибетләрдә сату башлангач, Татарстаннан тыш, Мәскәүдә ихтыяҗ арткан. Казанда 90 сумга сатыла торган журналларны чит төбәкләрдә 200 сумга да алып бетерәләр икән. Чит төбәкләрдән килгән журналистлар бу мәгълүматны аеруча кызыксыну белән тыңлады, чөнки һәр редакция үз «җимешен» шулай сата ала.

«Шәһри Казан» газетасы баш мөхәррире Радик Сабиров социаль челтәрләрдә акча эшләү юллары белән таныштырды. Ул җитәкләгән редакция «Вконтакте» челтәрендә зур аудитория туплау хисабына өстәмә керем табуга ирешкән. Ул һәр журналистка кызыклы төркемнәр алып барырга, язылучылар җәлеп итәргә киңәш бирде. Аның сүзләренчә, сәхифә халыкка кызыклы булса, реклама бирергә теләүчеләр табыла. Аның редакциясендә социаль челтәрләр аша өстәмә керемгә ия булучы журналистлар бар икән.

«Идел» журналы баш мөхәррире Рәмзия Галимова редакция акчасын сарыф итмичә 600 кешелек аудитория өчен төрле чаралар, презентацияләр үткәрү мөмкинлеге турында сөйләде. Мәсәлән, Бәшир Рәмиев исемендәге технопарк түбәсендә «Идел»нең яңа санын шигъри кичә форматында халыкка тәкъдим итү редакциягә «бер тиенгә» дә тормаган. Рәмзия Галимова бу эшне иганәчеләр табып, аларны журнал аша таныту юлы белән башкарып чыккан. «Бартер дигән тылсымлы сүз барын аңларга кирәк», – диде ул.

«Ялкын» журналы баш мөхәррире Илназ Фазуллин редакциянең яшьләр белән хезмәттәшлек аша уңышка ирешү серләрен ачты.