Яшел Үзән районына «Иван Купала» бәйрәменә Донецк Республикасыннан ансамбль киләчәк

8 июльдә Яшел Үзән районы Ильинский авылында славян халыкларының республикакүләм «Иван Купала» бәйрәме узачак.

Скопировать ссылку

8 июльдә Яшел Үзән районы Ильинский авылында узачак славян халыкларының «Иван Купала» бәйрәменә Донецк Халык Республикасыннан һәм Белоруссиядән фольклор ансамбльләре киләчәк.

«Республикакүләм «Иван Купала» бәйрәме быел тәүге мәртәбә безнең районда - Ильинский авылында узачак. Бәйрәмдә Донецк Халык Республикасыннан һәм Белоруссиядән фольклор ансамбльләре катнашачак», - диде Яшел Үзән районы Мәдәният идарәсе җитәкчесе Марат Минһаҗев ТР Хөкүмәт йортында узган брифингта.

Бәйрәм 14 сәгатьтә тәкыялар үрү, курчаклар, талисманнар ясау буенча мастер-класслардан башланачак. Шулай ук биредә декоратив-гамәли иҗат товарлары ярминкәсе дә оештырылачак.

«Урта гасырлар сугышы буенча турнир һәм тимерчелек осталыгы фестивале үткәрергә планлаштырабыз. Урта гасырлар сугышчылары киемнәре, шлемнары белән фотога төшү урыны булачак», - диде Марат Минһаҗев.

Программага шулай ук суга тәкыялар җибәрү, ут театры чыгышы кергән. Чара учак тирәли әйләнү уены белән тәмамланачак.

Сәхифәләр

Яшел Үзән районына «Иван Купала» бәйрәменә Донецк Республикасыннан ансамбль киләчәк