«Ярдәм» фонды гомуммилли хәйрия фонды: Яңа инклюзив үзәк ачыла, спорт юнәлеше үсештә

Төзелешләр дәвам итә, изге Рамазан җитә

«Ярдәм» фонды һәм мәчете матбугат очрашуының көн тәртибенә узган елга йомгак ясау, «Ярдәм» яңа инклюзив үзәгендә, шулай ук Апаста малайлар өчен яңа «Заһретдин» пансионатында эшләр барышы белән танышу кебек мәсьәләләр кертелгән иде. Шулай ук быел февраль-март айларында мөселман кардәшләр өчен изге Рамазан аен үткәрү планнары тәкъдим ителде.

«Изге ураза вакыты гөнаһлардан арыну чоры буларак та билгелле. Без биредә, «Ярдәм» иман йорты комплексында, ике меңгә якын кеше өчен ифтар табыннары әзерлибез. Төп миссиябез – Аллаһы Тәгалә кушканча, халык арасында мәрхәмәтлелек тарату. Без Рамазан аен зур шатлык хисе белән каршылыйбыз», – ди Фонд советы рәисе, «Ярдәм» мәчете имам-хатыйбы, мөфти киңәшчесе һәм Татарстан Республикасы Иҗтимагый палатасы әгъзасы Илдар хәзрәт Баязитов.

«Ярдәм» инклюзия үзәге төзелеше бара. Ул сәламәтлек мөмкинлекләре чикләнгән кешеләрнең төрле категорияләре өчен бушлай хезмәтләрнең киң спектрын тәкъдим итәчәк. «Ярдәм» фонды балалар белән эшләүгә юнәлтелгән объектларны да киңәйтә. Апас шәһәр тибындагы бистәсендәге яңа «Заһретдин» малайлар пансионатын бизәү эшләре төгәлләнеп килә. Комплекс бер уку елында 40 балага исәпләнгән. Шул ук вакытта республиканың Балтач районы Түнтәр авылында кызлар өчен пансионат төзү эшләре дәвам итә.

Быел «Ярдәм» инклюзив үзәген төзелешен тәмамлау планлаштырыла

Әңгәмәдәш, быел инклюзив үзәкне сафка бастырырга ниятләүләрен дә әйтеп үтте.

«Ярдәм» инклюзия үзәген төзү дәвам итә. Ул сәламәтлек мөмкинлекләре чикле булган төрле категория кешеләр өчен бушлай хезмәтләрнең киң спектрын тәкъдим итәчәк. Өч катлы бина лифт һәм уңайлы баскычлар белән җиһазландырылачак. Ай саен үзәккә Татарстаннан гына түгел, Россиянең башка төбәкләреннән дә 800гә якын кеше килә алачак. Дәресләр үзәктә дә, өстәмә 500 кешене кабул итә алачак «Дан» инклюзив спорт-сәламәтләндерү комплексында да узачак. Шулай итеп, бирегә аена барлыгы 1,3 мең кеше, ә елына 15,6 меңнән артык кеше килә алачак. Максатыбыз бер – игелек эшләү», – дип белдерде Баязитов.

Чыгышы барышында спикер, башка яшьләр һәм балалар белән алып барылган эшчәнлеккә дә тукталып узды. «Ярдәм» фонды балалар белән эшләүгә юнәлтелгән объектларын да арттыра. Апас шәһәр тибындагы бистәсендә яңа «Заһретдин» малайлар пансионатын бизәү эшләре төгәлләнеп килә. Комплекста уку елы вакытында 40 бала торып укый алачак. Шул ук вакытта республиканың Балтач районы Түнтәр авылында кызлар өчен пансионат төзү эшләре дәвам итә.

«Хаджар» рухи-әхлакый үзәгенең эшчәнлеге төрле яшь төркемнәренә юнәлдерелгән дистәләгән чаралардан тора. «Кышкы уен» гаилә спорт эстафетасыннан һәм балалар Сабан туеннан алып 300дән артык тамашачыны җыйган «Мәүлид-ан-Нәби» театральләштерелгән тамашасына кадәр. Балалар белән эшләүгә дә аерым игътибар юнәлтәбез. Былтыр җәй буена рухи-әхлакый курсларның дүрт сменасы оештырылды, аларда 250дән артык бала катнашты. 2025 елның октябрендә Татарстан Мәгариф министрлыгыннан өстәмә белем алуга лицензия алу мөһим казаныш булды, бу үзәкнең белем бирү программалары статусын законлаштырды һәм күтәрде», – диде ул.

Шулай ук матбугат очрашуы барышында пандемия чорында башланган «Тормыш юлы» акциясен дәвам итү турында сөйләделәр. Ул бүгенге көндә системалы рәвештә гамәлгә ашырыла, мохтаҗлар эш көннәрендә социаль ашханә форматында кайнар ризык белән тәэмин ителә. Бер елда дистәләгән мең кайнар ризык порциясе таратылган. Шулай ук инвалидларга адреслы ярдәм күрсәтү чаралары да дәвам итә. Бер елда мохтаҗларның үтенече буенча 10га якын инвалид коляскасы сатып алынган.

«Безнең фонд төрле проектлар аша кешеләрнең тормышын яхшыртырга тели. Әйтик, тимер рәшәткә артыннан чыккан кешеләргә туры юл күрсәтү, аларны эшле һәм ашлы итү өчен дә кулдан килгәнчә эшләр башкарыла», – дип тә өстәде хәзрәт.

«Ярдәм» фонды эшчәнлеге белән танышкан барлык делегацияләр, шул исәптән Ерак гарәп илләреннән дә, аның барлык проектлары башка хәйрия оешмалары өчен үрнәк булып тора, дип тә билгеләп үттеләр очрашу барышында.

«Ватанны саклаучылар гаиләләренә ярдәм» курсын оештырганнар

Журналистларның сорауларына ачыклык керткәндә, Илдар хәзрәт Баязитов гамәлгә ашырылган курслар һәм аларның актуальлеге хакында да искәртте.

«Фондыбыз төрледән-төрле курслар һәм чаралар оештырып тора. Мәсәлән, былтыр терәк-хәрәкәт аппараты эшчәнлеге бозылган кешеләр өчен «Бер-беребезгә ярдәм итәбез» дигән өч курс оештырылды. Анда 75ләп кеше катнашты. Сукырлар һәм начар күрүчеләр өчен «Йөрәк белән күрергә һәм ишетергә» дип аталган курслар да узды. Аннары «Ватанны саклаучылар гаиләләренә ярдәм» курсларын оештырдык. Бу курсларга хәрбиләрнең аналары, хатыннары һәм балалары җәлеп ителде. Барлыгы 10 гаилә һәм 20ләп кеше катнашты. Безгә тернәкләнергә килүчеләрнең географиясен карасак, илнең һәр төбәгеннән килүчеләр бар», – диде спикер.

Тернәкләнү узарга теләүчеләр Татарстаннан гына түгел, Башкортстан, Краснодар, Ставрополь, Ульяновск, Чувашия, Чиләбе, Мәскәү, Марий Эл, Оренбург, Ростов, Пенза, Омск, Дагыстан, Ингушетия һәм башка яклардан килә.

«Тернәкләнергә килүчеләр һәрберсе үзенчәлекле. Бу – илнең төрле почмакларыннан килгән төрле милләт вәкилләре. Ләкин аларның барысын да бер фактор берләштерә – «Ярдәм» хәйрия фонды каршындагы укыту-тернәкләндерү үзәге директоры Мәликә ханым Гыйльметдинова тернәкләнүчеләрнең һәрберсенең иң якын туганына әйләнә. Күп очракта курсларга килүчеләр туганлашып, дуслашып бетә», – дип сөйләде курслар турында хәзрәт.

Безнең фонд бик бай дигән сүзләр – миф, дип билгеләп үтте шулай ук журналистлар белән очрашу азагында Баязитов. «Чынлыкта безгә кечкенә генә ярдәм дә комачауламаячак. Шул ук вакытта безнең даими партнерлар башкаларга ярдәм итмичә яши алмый», – диде ул.

Спорт белән мавыгучы инвалидлар арткан

«Дан» инклюзив спорт-сәламәтләндерү комплексы хезмәткәре, хоккейчы Айгөл Рәимова инклюзив спорт өлкәсендәге эшчәнлек белән таныштырды.

«Спорт белән шөгыльләнүче инвалидлар артты. Узган елда спорт белән шөгыльләнүче сәламәтлек мөмкинлекләре чикле кешеләр саны ике тапкырга – 250 кешедән 500 кешегә кадәр күбәйде. Шулай ук коммерция секцияләрендә даими нигездә шөгыльләнүче спортчыларны колачлау 40 процентка артты. Аларның саны 300 булды. Узган елда элемтәләрнең бик күп яңа юнәлешләре ачылды. Аерым алганда, «Интегра» коляскалы футбол командасы белән килешү имзаланды. Нәтиҗәдә Ростовта, Түбән Тагилда һәм Санкт-Петербургта бөтенроссия чараларында катнашу өчен Татарстан Республикасы Рәисе грантын алуга ирештек», – дип белдерде спикер.

Ул шулай ук спортның башка төрләрендәге казанышлар белән дә таныштырды.

«Коляскада баскетбол кебек спорт төре дә актив үсә. Безнең спортчыбыз, команда капитаны Руслан Кожевников коляскада баскетбол буенча Россия җыелма командасы спорт җыеннарында катнашуын дәвам итә. Узган елда Казан спорт комитеты белән берлектә баскетбол, футзал, грек-рим көрәше спорт төрләре буенча сигез чара узды. Иң масштаблы ярыш грек-рим көрәше турниры булды. Анда һәр чарага 300гә якын катнашучы килде. Барлык турнирлар да «Дан» спорт комплексында уздырылды. Калининградтан Владивостокка кадәр төрле шәһәрләрдән спортчылар җыелды. Быел да Казахстаннан килгән кунакларыбызны күрүебезгә бик шат идек», – йомгаклады сүзен Айгөл Рәимова.

2022 елның 1 июнендә «Ярдәм» фонды сәламәтлек мөмкинлекләре чикләнгән кешеләр өчен «Дан» инклюзив спорт комплексын ачты. Комплекста инвалид гражданнар бушлай күнегүләр ясый ала. Биредә авыр тормыш хәлендә калган кешеләрне физик һәм социаль адаптацияләү белән шөгыльләнәләр.

«Дан»да 140ка якын спортчы һәм тернәкләндерүче адаптив спорт төрләре белән шөгыльләнә: паратеннис, коляскада баскетбол, утырган килеш волейбол, фитнес, дәвалау физкультурасы төркемнәрендә шөгыльләнү, растяжка, бочча һәм башкалар. Монда аутистизм характерындагы менталь проблемалары, ДЦП авыруы һәм башка диагнозлары булган балалар шөгыльләнә.

Ханты-Манси өлкәсеннән Раушания Исхакова: «Ярдәм» Себердәге татарларны да берләштерә»

Ахырдан Ханты-Манси өлкәсеннән танылган җәмәгать эшлеклесе һәм журналист Раушания Исхакова да фикерләре белән уртаклашып алды. Ул – Татарстан Республикасы Журналистлар берлеге әгъзасы, җәмәгать эшлеклесе буларак Себер татарлары тормышында актив катнаша, күптөрле чаралар оештыра. Шулай татар халкына күрсәткән олы хезмәтләре өчен Бөтендөнья татар конгрессы медале белән бүләкләнгән.

«Илдар хәзрәт Баязитов чыгышындагы һәр сүз игътибарга лаек иде. Сорауларга канәгатьләндерерлек җаваплар алдык. Аннары мин, җәмәгать эшлеклесе буларак шуны да әйтә алам, «Ярдәм» фонды Себердәге татарларны да берләштерә. Узган ел фонд тарафыннан чыгарылган календарьләрне мәчеттә «Яулык бәйрәме» үткәргән вакытта кыз балалар һәм өлкән яшьтә мәчеткә йөргән апаларга бүләк итеп тараттым. Мин анда «Ярдәм» фонды һәм мәчете турында сөйләдем», – дип сөйләде ул.

Очрашуда социаль җаваплылык темасына аерым игътибар бирелде. Илдар хәзрәт Баязитов хәйрия эшен даими гадәт итеп башкарырга өндәде. «21 көн рәттән хәйрия эшләп карагыз, яхшылык тормышыгызның бер өлеше булачак», – диде һәм медиа белән эшләүдә ачыклык һәм ышанычның мөһимлеген белдерде.