"Ярдәм" үзәгендә ачылган инклюзив уен паркында сары төс беренче тапкыр кулланылган
"Обнаженные сердца" фонды менеджеры сүзлəренчə, əлеге төсне начар күрүчелəр башка төслəргə караганда яхшырак аера.
(Казан, 15 декабрь, "Татар-информ", Зилə Мөбəрəкшина). Казанның "Ярдəм" мəчете үзəгендə ачылган инклюзив уен паркы проектында сары төсне беренче тапкыр кулланганнар. "Обнаженные сердца" балаларга ярдəм итү фонды менеджеры Мария Редколис бу хакта "Татар-информ" хəбəрчесенə сөйлəде.
"Начар күрүчелəр яисə күрмəүчелəр сары төсне башка төслəргə караганда яхшырак аера. Алар өчен сары төскə буялган тренажерларда шөгыльлəнү уңайлырак булыр", - ди Мария Редколис.
"Россия буенча мондый мəйданчыкларның саны 200гə кадəр җитте. "Ярдəм" мəчете янындагы парк - 195нчесе. "Ярдəм" үзəге болай гына сайланмады, монда бит мөмкинлеклəре чикле булган, сəламəтлеклəре какшаган яшүсмерлəр бихисап. Аларның күбесе нəкъ шул үзəккə йөри", - диде Мария Редколис.
Мария Редколис инклюзив паркта төрле функциядəге мəйданчыклар барлыгын билгелəп узды. "Монда кечкенə балаларга, җиде яшьтəн унике яшькə кадəрге балаларга, яшүсмерләр һəм олылар өчен тренажерлар бар", - диде ул.
- Татарстанның спорт министры Владимир Леонов "Ярдəм" мəчете янындагы инклюзив паркны дөнья чемпионаты мирасы дип атады.
Парк Татарстан Республикасы хөкүмəте, Казан шəһəре администрациясе ярдəме белəн төзелгəн. Проект балаларның һəм яшүсмерлəрнең физик, менталь яки сенсор үзенчәлекләренә карамастан, аларның яшьтəшлəре белəн спортта шөгыльлəнү, уйнау мөмкинчелеген булдыру максатыннан гамәлгә ашырыла.