Яңалиф турында спектакль-тикшеренү әзерләнә
Режиссер Әминә Миндияр D»әrt труппасы белән «Яңалиф» спектакль-тикшеренү чыгара.
«Мин Советлар Союзында беренче язу машинкасы Казанда эшләнгәнлеге турында быел ишеттем. Аны эшләүдә безнең каллиграфлар катнашкан. Шуннан миңа латин алфавиты кертелү чоры кызыклы булып китте һәм мин Алсу Хафиздан текст язуын сорадым», – диде режиссер «Татар-информ» хәбәрчесенә.
100 ел элек яшь совет дәүләтендә төрки халыклар кулланган гарәп алфавитын латиницага күчерү турында фикерләшүләр башлана. Яңа спектакль шушы чор турында.
Премьера ноябрь аенда көтелә. Аның вакыты һәм урыны турында соңрак хәбәр ителәчәк
D»әrt труппасы – нигездә һәвәскәрләрдән төзелгән труппа. «Яңалиф» спектакленә Әминә Миндияр Татарстанның халык, Россиянең атказанган артисты Нуриәхмәт Сафинны да чакырган.