«Яңа исем» проекты шәкертләре Муса Җәлил музей-фатиры белән танышты
«Яңа исем» проекты шәкертләре, студентлар, укытучылар Муса Җәлил музей-фатирында булды. Музейның өлкән фәнни хезмәткәре Ләйсән Харасова шагыйрьнең язмышы, иҗади эшчәнлеге, әсирлектә күргәннәре турында сөйләде. Бу хакта «Казан утлары» журналы редакциясенең smm-белгече Алинә Хәбибуллина хәбәр итә.
«Ләйсән Харасова Муса Җәлилнең фатиры, шәхси китапханәсе, шагыйрьнең үзе исән чакта һәвәскәр рәссам Гимад Тимербулатов эшләгән беренче бюст һ.б. турында күп кенә кызыклы мәгълүмат сөйләде. Музейда шәкертләр төп нөсхә экспонатлар белән танышу бәхетенә ия булдылар. Күргәзмәләр залында «Мусаларда кунакта» интерактив күргәзмәсе эшли. Монда килүчеләр үзләрен Җәлил туган йортта – Оренбург өлкәсе Мостафа авылында итеп хис итте. Чәчәкле чаршау-кашагалар, кызыл башлы сөлгеләр, сәке һәм мич, кием-салым, бик күп серләрне үзенә җыйган сандык кунакларның музей белән танышуын кабатланмас вакыйгага әйләндерде», – диде ул.
Аның әйтүенчә, чара «Яңа исем» проекты кысаларында оештырылган.
«Яңа исем» әдәби мәктәбе «Татмедиа» АҖнең «Казан утлары» журналы редакциясе каршында эшли. Анда 14 яшьтән 35 яшькәчә башлап язучылар остазлар белән берлектә каләм чарлый, язу серләренә төшенә. Татарстан китап нәшриятында «Яңа исем» шәкертләре әсәрләреннән альманах басылып килә. Февраль аенда йомгак ясалыр дип көтелә. Проект Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре буенча комиссия ярдәме белән тормышка ашырыла.