Яңа Чишмә районы Буревестник авылы халкы махсус операциядәге якташларына ярдәм җибәргән
Татарстанның Яңа Чишмә районы Буревестник авылы башлыгы Юрий Улитин һәм Сергей Логинов Херсон юнәлешендә махсус операциядә катнашучы якташларына гуманитар ярдәм илтте.
Хәрбиләр өчен кирәк-ярак: шәхси посылкалар, өй күчтәнәчләре, беренче чиратта кирәкле әйберләр җыю өчен бөтен авыл берләшкән.
Чыгышы белән шушы авылдан булган Юрий Улитин җитәкләгән транспорт компаниясе кырда эшләү өчен кирәк булган генератор, резина, запчастьләр, җиһазлар биргән.
Сугышчылар якташларына ярдәм өчен рәхмәт әйткән һәм туган авылларына сәлам юллаган.
«Безне онытмавыгыз өчен рәхмәт. Сезнең ярдәм – әйбер генә түгел, ә өйдә безне истә тоталар дигән ышаныч та», – дигән алар.
Элегрәк ТР Рәисе Рөстәм Миңнеханов Татарстан Дәүләт Советына еллык Юлламасында махсус хәрби операциядә катнашучыларга ярдәм күрсәтүгә мөһим өлеш керткән өчен волонтерларга рәхмәт белдерде.
«Кешеләр моны үз тирәсендә шундый ук битараф булмаган гражданнарны берләштереп, фикердәшләрдән тулы бер командалар җыеп ихлас күңелдән һәм чын йөрәктән эшли», - дип искәртте республика җитәкчесе.
Соңрак Татарстан Рәисе Мәскәү Кремлендә Россия Президенты Владимир Путин белән очрашуда да махсус операциядә катнашучыларга ярдәм күрсәтү турында сөйләде.
«Гуманитар ярдәм күрсәтү буенча бик зур эш башкарабыз. Һәр шәһәргә, һәр муниципалитетка барабыз. Халык та, компанияләр дә гуманитар ярдәм җыю буенча актив эшли: 4389 тонна йөк формалаштырылды һәм җибәрелде», – диде ул.
23 гыйнвардан Татарстанда РФ Саклану министрлыгы белән контракт төзүчеләргә 2,8 миллион сум акча бирелә. Акчаның күләме арту республикада түләүләр күтәрелүгә бәйле. Яңа түләү 2025 елның 1 апреленә кадәр гамәлдә булачак. Хәрбиләрнең махсус операция зонасында аена 210 мең сум акча алуын да истә тотарга кирәк.
Фото: ТР Яңа Чишмә районы хакимияте матбугат хезмәте