Яңа Чабаксарның «Туган тел» клубы кызлары ГТО нормаларын тапшырды
Чувашиянең Яңа Чабаксар шәһәре «Туган тел» клубы кызлары ГТО нормаларын тапшырды. Бу хакта Бөтендөнья татар конгрессы матбугат хезмәте хәбәр итә.
Алар Физкультурачылар көне уңаеннан Яңа Чабаксар шәһәрендә үткәрелгән «Чувашия хатын‑кызлары берлеге» хатын‑кыз клублары арасында ГТО фестивалендә катнашты. Әлеге чара Чувашия Республикасы башлыгы Олег Николаевның «Чувашиянең якты җәе» проекты кысаларында узды.
Яңа Чабаксар шәһәре хакимияте башлыгы Александр Алексеев, сәнәгать һәм энергетика министры Марат Якушев, Чувашия Дәүләт Советының «Бердәм Россия» фракциясеннән депутат Ольга Петрова һәм шәһәр хакимияте башкарма комитетының социаль мәсьәләләр буенча урынбасары Венера Сергеева катнашучыларны бу күркәм вакыйга белән котлады.
«Безнең хатын-кызлар – чын спортчылар, активлар һәм матурлар! Сезнең үрнәгегез меңләгән шәһәр кешесен илһамландыра», – дип белдерде Александр Алексеев.