«Ялкын» журналы язылучылар арасында фитнес-беләзек, колакчыннар һәм колонка уйната
Бәйгедә катнашу өчен киләсе яртыеллыкка журналга язылырга кирәк.
(Казан, 22 май, «Татар-информ», Зилә Мөбәрәкшина). «Ялкын» журналын киләсе ярты еллыкта алдыру өчен язылучылар JBL T500BT чыбыксыз колакчыннары, JBL CLIP 3 портатив колонкасы һәм Honor Band 5 фитнес-беләзек ота ала. Бу хакта журналның инстаграмдагы сәхифәсендә хәбәр ителә.
«Язылу өчен: „Татмедиа“ сайтына керергә, „подписка“ төймәсенә басарга, „Ялкын“ журналын сайларга һәм язылырга яисә почта бүлекчәсенә барып, язылып кайтырга кирәк. Ярты елга язылу бәясе — 402 сум „Ялкын“ журналына язылу турындагы квитанциянең сурәтен ватсап аша 8-9179076942 номерына юлларга кирәк. Шулай ук yalkin@bk.ru почтасына да кабул ителә», — дип язылган хәбәрдә.
Квитанцияләрне 26 июньгә кадәр юлларга мөмкин, җиңүчеләр 15 июльгә кадәр туры эфирда очраклы сайлап алу юлы белән ачыкланачак, дип әйтелә хәбәрдә.