Фән һәм мәгариф 9 июнь 2019 16:43

Якын арада мәктәп программасына яңа предметлар кертелмәячәк

Аерым алганда, бу мәсьәлә гаилә кыйммәтләре дәресен кертү турындагы тема белән бәйле иде.

Скопировать ссылку

(Казан, 9 июнь, «Татар-информ»). РФ Мәгариф министрлыгы якын арада мәктәп программасына яңа предметлар кертүне планлаштырмый. Бу хакта ТАСС агентлыгы ведомствоның матбугат хезмәтенә сылтама белән хәбәр итә.

«Министрлык Россия мәгарифе өчен актуаль инициативаларны билгеләнгән тәртиптә карый. Хәзерге вакытта яңа предметлар кертү күздә тотылмый», - дип искәрттеләр министрлыкның матбугат хезмәтендә.

Аерым алганда, бу мәсьәлә гаилә кыйммәтләре дәресен кертү турындагы тема белән бәйле иде. Моңа кадәр бала хокуклары буенча вәкаләтле вәкил Анна Кузнецова Петербург халыкара икътисади форумында белдергәнчә, гаилә кыйммәтләре дәресләрен кертү механизмы турындагы карар федераль ведомство тарафыннан быелның икенче кварталы ахырына кадәр кабул ителергә тиеш.

Россия Президенты тарафыннан 2017 елның 29 маенда кабул ителгән указ нигезендә, илдә Балачак унъеллыгы (2018-2027 еллар) игълан ителде. Аның максаты – балаларны саклау өлкәсендә дәүләт сәясәтен камилләштерү.

#Мәгариф министрлыгы

Сәхифәләр

Якын арада мәктәп программасына яңа предметлар кертелмәячәк