Спорт 29 сентябрь 2020 15:03

Җәядән ату буенча Россия җыелма командасы Төркиядә шөгыльләнә

Россия җыелмасы киләсе айда узачак халыкара чемпионатка әзерләнә.

Скопировать ссылку

(Казан, 29 сентябрь, «Татар-информ»). Җәядән ату буенча Россия җыелма командасы Төркиянең Анталья провинциясендәге Кемер туристик районында җыеннар үткәрә. Составында 40 кеше булган Россия җәядән атучылар командасы Кемерга ике атна элек килде. Спортчылар Кириш кварталындагы бер кунакханәгә урнашты. Бу хакта Төркиянең «Анадолу» агентлыгы хәбәр итә.

Россия җыелмасы киләсе айда үткәрү күздә тотылган халыкара чемпионатка әзерләнә. Кемер муниципалитеты башлыгы Неджати Топалоглу спортчыларга уңышлар теләде.

«Без Россия спортчыларын үзебездә кабул итүебезгә шатбыз. Кемер — бик матур урын. Спортчылар бирегә әле кышын да киләчәкбез дип әйтә. Бу — бик яхшы. Туризм кышын шулай ук җанлана. Кемер муниципалитеты тиешле ярдәм күрсәтергә әзер», — диде Топалоглу.

Россия җәядән атучылар федерациясе башлыгы Владимир Ешеев Россия спортчыларының Кемерда үтә торган җыеннарга инде берничә ел килүен билгеләп үтте.

Әлеге районның климаты һәм табигате спортның теләсә кайсы төре белән шөгыльләнергә мөмкинлек бирә, диде ул.

«Октябрьдә җыенга тагын киләчәкбез», — дип өстәде Ешеев.

#Төркия #Россия

Сәхифәләр

Җәядән ату буенча Россия җыелма командасы Төркиядә шөгыльләнә