“Яңа шартларда туган телдә тәрбия” конференциясенең программасын хата белән язганнар
Оештыручы сүзләренчә, бу махсус эшләнгән.
Скопировать ссылку
(Казан, 18 ноябрь, “Татар-информ”, Зилә Мөбәрәкшина). Бүген It-паркта үткән “Яңа шартларда туган телдә тәрбия” дип аталган татар телле ата-аналар конференциясендә хаталы язулы программа таратылды. Чараны оештыручыларның берсе Айсылу Галиева “Татар-информ” хәбәрчесенә моның махсус эшләнгәнен әйтте.
“Бу махсус эшләнелде. Әгәр дә мәктәпләрдә татар теле кысрыклап чыгарылса, безнең менә шундый “хата белән язулы” көнгә калуыбыз ихтимал”, - диде ул хәбәрчегә.
Айсылу Галиева барлык хаталарны тапкан унҗиденче кешегә бүләк – бер флешкада тупланган татар телендә аудиокитаплар биреләчәген әйтте. Шулай ук җиңүче татар телендәге уку әсбапларын, уеннарны сатып алырга мөмкин.
- Конференциягə Татарстанның төрле шəһəрлəреннəн, Башкортстаннан, Кырымнан галимнəр, укытучылар һəм иҗтимагый оешмалар килгəн. Чарада барлыгы 300 кеше катнаша. Алар милли мәгариф мәсьәләләре буенча фикер алыша.
- Чараны "Татар ата-аналары" иҗтимагый төркеме һәм Бөтендөнья татар яшьләре форумы оештыра.
