Яңа авиарейслар ачарга ниятлибез – Ленар Сафин
Быел Казаннан Ереванга, Тель-Авивка, Кытай шәһәрләренә авиарейслар ачу буенча сөйләшүләр бара.
(Казан, 27 апрель, “Татар-информ”, Надежда Гордеева). Бүген Татарстан башкаласы аэропортында Рига – Казан – Рига рейсын ачу вакытында Татарстан транспорт һәм юл хуҗалыгы министры Ленар Сафин журналистларга яңа авиаюнәлешләр турында сөйләде.
Министр сүзләренчә, июньдә Тбилисидан Казанга рейслар ачыла. Алар атнасына ике тапкыр башкарылачак. Моннан тыш, 30 майдан Казан – Пекин даими рейсын ачу ниятләнә.
“Тагын ике юнәлештә рейслар ачуны планлаштырабыз. Мәсәлән, Калининград белән туры авиаэлемтә булачак. Нәрсә вәгъдә итәбез – барысын да үтибез”, – диде Ленар Сафин. Быел шулай ук Казаннан Ереванга, Тель-Авивка, Кытай шәһәрләренә авиарейслар ачу буенча да сөйләшүләр бара.