Хөснуллин: Россиянең Ислам илләре белән товар әйләнеше 37 процентка артты
Россия белән Ислам дөньясы илләренең товар әйләнеше бүгенге көндә 156 миллиард долларны тәшкил итә. Ул узган елдан 37 процентка арткан. Бу хакта вице-премьер Марат Хөснуллин белдерде.
«Россия мөселман илләрен ышанычлы партнерлар буларак күрә. Бүгенге көндә Россия Федерациясенең Ислам дөньясы илләре белән товар әйләнеше 37 процентка артты һәм 156 миллиард долларны тәшкил итә», – диде ул «Россия – Ислам дөньясы: KazanForum» Халыкара икътисадый форумына әзерлек буенча оештыру комитеты утырышында.
«Узган форум югары дәрәҗәдә узды. Татарстан җитәкчелегенә һәм Рөстәм Миңнехановка рәхмәт белдерәм. Быел да барлык чараларның бик югары дәрәҗәдә узачагына ышанам», - дип ассызыклады Хөснуллин.
Мәскәүдә оештыру комитеты утырышында 35 кеше катнашкан, шул исәптән Татарстан Рәисе Рөстәм Миңнеханов һәм Татарстанның Россия Федерациясендәге тулы вәкаләтле вәкиле Равил Әхмәтшин.
«Россия — Ислам дөньясы: KazanForum» XV Халыкара икътисадый форумы Казанда 14-19 майда узачак. Рөстәм Миңнеханов сөйләвенчә, әлеге чарада 16 меңнән артык кеше катнашыр дип көтелә.