Хөснуллин Казанда яшәүче Ильясның һәм тагын өч баланың хыялын тормышка ашырачак
РФ вице-премьеры Марат Хөснуллин «Теләкләр чыршысы» хәйрия акциясенә кушылды. Ул дүрт баланың, шул исәптән Казанда яшәүче кечкенә малайның хыялын тормышка ашырачак, дип хәбәр итә ТАСС.
Татарстан башкаласында яшәүче унбер яшьлек Ильяс Нуриев өч тәгәрмәчле велосипед турында хыяллана. «Без җәмәгать транспорты белән шөгыльләнәбез, шуңа күрә моны җәмәгать транспорты дип кабул итик. Һичшиксез бүләк итәчәкбез», - дип вәгъдә итте Россия Хөкүмәте Рәисе урынбасары.
Моннан тыш, Хөснуллин Курск өлкәсе Замостье авылында яшәүче 8 яшьлек Дарина Литвинова һәм аның Луганск Халык Республикасы Лутугино шәһәрендә яшәүче яшьтәше Дмитрий Григорьевның теләкләрен үтәячәк. Дарина электр самокаты турында хыяллана, Дмитрий исә бүләккә конструктор алырга тели.
РФ вице-премьеры шулай ук Пахорка авылыннан (Новофедоровский авылы, Мәскәү) 11 яшьлек Никита Виноградовка да хыялын тормышка ашырырга ярдәм итәчәк. Малай чын театр сәхнә артын күрергә тели. Ул Мәскәү Губерна театры труппасы белән очрашачак.
- «Теләкләр чыршысы» бөтенроссия хәйрия акциясе 2018 елдан бирле бөтен илебездә уза. Дәүләт учреждениеләре, коммерция оешмалары вәкилләре, шәхси затлар ел саен 3 яшьтән алып 17 яшькә кадәрге балаларның теләкләрен тормышка ашыра. Быел акция 15 ноябрьдән 28 февральгә кадәр дәвам итә.