Җәмгыять 30 май 2022 14:54

Халык санын алу нәтиҗәләре буенча Татарстан халкы 4 миллионнан артып киткән

Скопировать ссылку

Бөтенроссия халык санын алуның башлангыч нәтиҗәләре буенча, Татарстанда 4 млн кеше яши, шуларның 3 миллионнан артыгы - шәһәр халкы. Мондый мәгълүматларны Дәүләт статистикасы федераль хезмәте бастырып чыгарды.

«2010 елгы халык санын алу белән чагыштырганда, Россия Федерациясенең 28 субъектында халык саны артты. Россиянең иң күп халыклы төбәкләре - Мәскәү, Мәскәү өлкәсе, Краснодар крае, Санкт-Петербург, Свердловск һәм Ростов өлкәләре, Башкортстан һәм Татарстан. Аларда ил халкының өчтән бере яши», - дип билгеләп үтә статистика белгечләре.

Халык санын алуның башлангыч мәгълүматлары нигезендә, Россиядә урбанизация процессы дәвам итә: халыкның 75 проценты - шәһәр торак пунктларында, 25 проценты авыл җирлегендә яши. 2010 елда шәһәр һәм авыл халкының чагыштырмасы 74 процент һәм 26 процент тәшкил итте.

Моннан тыш, илдә миллион-шәһәрләр саны 16га җиткән. Алар арасында Татарстан башкаласы Казан бар.

Исәпкә алуның ахыргы нәтиҗәләре 2022 елның 31 декабренә кадәр билгеле булачак һәм басылып чыгачак.

Сәхифәләр

Халык санын алу нәтиҗәләре буенча Татарстан халкы 4 миллионнан артып киткән