Хәйдәр Сафиуллин Чувашиядә татар төбәкчеләре клубы оештырырга ниятли
Чувашия татарларының тарихы өйрәнелмәгәне, авыллар тарихы язылмаганы ачыкланган.
Чувашия татарларының милли-мәдәни автономиясе рәисе Хәйдәр Сафиуллин татар төбәкчеләре клубы оештырырга ниятли.
"Соңгы арада тарих белән ныклап кызыксына башладым. Чувашия татарларының тарихы өйрәнелмәгәне ачыкланды. Халык үз авылларының килеп чыгышын белми. Авыллар тарихы язылмаган. Бу эшне башлап җибәрергә кирәк. Моның өчен татар төбәкчеләре клубы оештырырга ниятлим", - диде Хәйдәр Сафиуллин "Югары һәм Урта Идел буе татарлары тарихында һәм мәдәниятендә ислам" темасына Чабаксарда оештырылган төбәкара фәнни-гамәли конференциядә.
Хәйдәр Сафиуллин күрше төбәкләрдә - Ульян, Түбән Новгород өлкәләрендә татар авылларының тарихы язылганын белдерде.
Бүген Чабаксарда "Югары һәм Урта Идел буе татарлары тарихында һәм мәдәниятендә ислам" темасына төбәкара фәнни-гамәли конференция уза. Конференциядә Чувашия, Марий Эл республикаларының, Түбән Новгород, Ульян өлкәләренең татар милли-мәдәни оешмалары рәисләре, Казан, Чабаксар, Мәскәү галимнәре һәм дини оешмаларның җитәкчеләре, Чувашиянең мәдәният министры урынбасары Георгий Богуславский һәм башкалар катнаша.
Фото: © Рифат Каюмов
Конференцияне Россия мөселманнары Диния нәзарәте Чувашия татарларының милли-мәдәни автономиясе һәм Чувашия мөселманнарының Диния нәзарәте белән берлектә оештырган.