Казанда такси йөртүчесе светофорның кызыл утына чыккан һәм KIA белән бәрелешкән
Кичә кич Казанның Вишневский урамында ике җиңел машина катнашында юл-транспорт һәлакәте булган. Бу хакта шәһәр Дәүләт автоинспекциясе хәбәр итә.
Хокук сакчыларының мәгълүматлары буенча, Татарстанның Лаеш районында яшәүче 51 яшьлек такси йөртүче хатын-кыз, Заслонов урамы ягыннан Әмирхан Еники урамы буйлап хәрәкәт иткәндә, Вишневский урамын светофорның кызыл утына чыккан. Шул вакытта аңа автобус полосасы буйлап хәрәкәт иткән KIA K5 автомобиле килеп бәрелгән. Әлеге мизгел видеога эләккән.
Такси йөртүче хатын-кызны һәм хатын-кыз пассажирны ашыгыч ярдәм машинасында хастаханәгә озатканнар. Табиблар тикшергәннән соң, аларны өйләренә кайтарып җибәргәннәр.
Дәүләт автоинспекциясендә билгеләп үтүләренчә, такси йөртүче хатын-кызның стажы 18 ел тәшкил итә. Ике ел эчендә ул юл хәрәкәте кагыйдәләрен бозган өчен административ җаваплылыкка тартылмаган. KIA автомобиленең йөртүчесе, 29 яшьлек ир-атның стажы – 11 ел. Ике ел эчендә ул 15 тапкыр җаваплылыкка тартылган. Шул исәптән, 2026 елның маенда аңа медицина тикшерүеннән баш тартуы турында административ беркетмә рәсмиләштерелгән булган. Материал хәзерге вакытта судта карала.