Владимир Путин: Милли валюталарда исәп-хисапны арттыру икътисад үсешен сәясәттән арындыра

Милли валюталарда исәп-хисапларны арттыру БРИКС илләренең финанс бәйсезлеген арттырырга, икътисадны сәясәттән азат итәргә мөмкинлек бирә дип саный РФ Президенты Владимир Путин. Бу хакта ул Яңа үсеш банкы башлыгы Дилма Руссефф белән очрашуда белдерде.

«Җирле валюталарда исәп-хисапларны арттыру бурычка хезмәт күрсәтү өчен түләүне киметергә, БРИКСта катнашучы илләрнең финанс бәйсезлеген арттырырга, геосәяси рискларны мөмкин кадәр киметергә, хәзерге дөньяда мөмкин булганча икътисадны сәясәттән азат итәргә мөмкинлек бирә», - диде Россия лидеры.

Шул ук вакытта Владимир Путин билгеләп үткәнчә, 2018 елдан башлап Яңа үсеш банкы тарафыннан гомуми суммасы 33 млрд доллар булган 100 проект финансланган.

«Без быел БРИКСта рәислек иткән ил буларак, сезнең Казандагы БРИКС саммитында лидерлар очрашуында актив катнашуыгызга өметләнәбез», - дип өстәде РФ Президенты, Руссеффның берләшмәгә кергән илләр лидерлары белән очрашуы һәм банк эшчәнлеге турындагы доклад планлаштырылуын искәртеп.

Владимир Путин, шулай ук билгеләп үткәнчә, узган юлы ул үзенең әңгәмәдәше белән күптән түгел - быелның июнь аенда Санкт-Петербургта «Петербург халыкара икътисад форумы» кысаларында күрешүләрен һәм аның белән Банкның алдагы эше белән бәйле мәсьәләләр турында фикер алышуын әйтте.

«Без сезнең соңгы елларда башкарган эшләрегезне югары бәялибез. Гомумән, бу яхшы үсә торган перспективалы финанс институты», - дип бәяләде Владимир Путин.

• БРИКС берләшмәсе 2006 елда нигезләнде. Анда Бразилия, Россия, Һиндстан, Кытай, Көньяк Африка, Гарәп Әмирлекләре, Иран, Мисыр һәм Хәбәшстан керә. 2024 елда БРИКСта рәислек итү хокукы Россиягә күчте. Казанда узучы БРИКС саммиты – берләшмәдә катнашучы илләр башлыкларының 16нчы очрашуы. Саммитта оешманың барлык әгъзаларының мәнфәгатьләренә туры килә торган бик күп икътисади мәсьәләләр буенча фикер алышу планлаштырыла. БРИКСның 16нчы саммиты Казанда 22-24 октябрьдә була.

• Анда 33 дәүләт вәкиле катнашуын раслады. Владимир Путин аның кысаларында 15тән артык ике яклы очрашу үткәрергә җыена. Татарстан Рәисе Рөстәм Миңнеханов билгеләп үткәнчә, мондый дәрәҗәдәге вакыйганы үткәрү – республика өчен зур мәртәбә һәм җаваплылык. Республика башкаласы мэры Илсур Метшин ул көннәрдә шәһәрнең 20 меңгә якын кунакны кабул итәчәген әйтте.