Владимир Путин БРИКС турында: Безнең барлык илләр тигезлек һәм үзара хөрмәт булу яклы
Россия Президенты Владимир Путин Казан Экспо Халыкара күргәзмәләр үзәгендә узган БРИКС саммиты утырышында БРИКСта катнашучы дәүләтләрнең гаять зур сәяси, икътисади, фәнни-технологик потенциалга ия булуларын әйтте.
Аның әйтүенчә, БРИКСта катнашучы илләрнең барысы да тигезлек, яхшы күрше булып яшәү һәм үзара хөрмәт, дуслык, татулыкның югары идеалларын раслау, шулай ук иминлек өчен чыгыш ясый. «Шул ук вакытта безне уртак кыйммәтләр һәм дөньяга караш берләштерә. БРИКС фикердәшләрне үз эченә ала дип әйтү дөрес булыр. Төрле континентларны тәкъдим итүче суверен илләр, үсеш модельләре, диннәр, үзенчәлекле цивилизацияләр һәм мәдәниятләр», – дип билгеләде Владимир Путин.
«Эшчәнлекләрендә дөньяның киләчәге өчен җаваплылык күрсәтәләр, Глобаль тотрыклылык һәм куркынычсызлык өлкәсендәге хәлләргә уңай йогынты ясыйлар, кискен төбәк проблемаларын хәл итүгә саллы өлеш кертәләр», – дип өстәде Россия Президенты.
Аның сүзләренчә, БРИКСның Глобаль аренадагы курсы стратегиясенең асылы шунда: ул халыкара бергәлекнең төп өлеше, дөньякүләм күпчелекнең өметләренә җавап бирә.
-
БРИКС берләшмәсенә 2006 елда нигез салына. Анда Бразилия, Россия, Һиндстан, Кытай, Көньяк Африка, Гарәп Әмирлекләре, Иран, Мисыр һәм Эфиопия керә. 2024 елда БРИКСта рәислек итү хокукы Россиягә күчте. Казанда узучы БРИКС саммиты – берләшмәдә катнашучы илләр башлыкларының 16нчы очрашуы. Саммитта оешманың барлык әгъзаларының мәнфәгатьләренә туры килә торган бик күп икътисади мәсьәләләр буенча фикер алышу планлаштырыла.
БРИКСның 16нчы саммиты Казанда 22- 24 октябрьдә уза. Анда 33 дәүләт вәкиле катнашуын раслады. Владимир Путин аның кысаларында 15тән артык ике яклы очрашу үткәрергә җыена. Татарстан Рәисе Рөстәм Миңнеханов билгеләп үткәнчә, мондый дәрәҗәдәге вакыйганы үткәрү – республика өчен зур мәртәбә һәм җаваплылык. Республика башкаласы мэры Илсур Метшин ул көннәрдә шәһәрнең 20 меңгә якын кунакны кабул итәчәген әйтте.